Or est li rois Ganors a bon port arivez

Uns palefrois li fu maintenant aprestez

Et par l'estrier dore i est li rois montez

Dame Aie sor .i. mul qi bien fu afeutrez.

Il ont tant chevauchie q'il vindrent au degrez

Puis montent el palez qi bien fu aornez

A oeuvre sarasine entailliez et ovrez.

Au fenestres de marbre s'est li rois acoutez

Sa moillier en apele : "Dame, car ca venez

Vostre est toz li pais qanqe as elz veez

Assez avrez chastiax se penre les volez.

- Vostre merci, biau Sire, de qanque dit avez

Et vos feroiz de moi toutez vos volentez."