L'autor nasquèt en 1944 a Foix,

brèç enrodat de las montanhas

pus polidas del mond. Las quitèt pro lèu, tròp lèu. Los

estudis acabats, tornèt a Bordèu, puèi a Tolosa, vilas universitàrias

pus vesinas de las montanhas de son còr. Las pòt

atal cortejar a temps e léser. Militant occitanista de longa,

s'encarguèt del sector Recèrca de l'Institut d'Estudis Occitans

puèi ne foguèt, qualques annadas, lo President. Baileja,

dempuèi bèl temps, la revista «Lo Gai Saber».

«Nos caliá caminar...» fa lo raconte d'un viatge en 2CV

vielhassa a travèrs del Saarà, traversada qu'auriá poscut

s'acabar marridament.

A l'escòla d'un alpinisme de tria : «Escorreguda dins la

nuèit» conta una prumièra experiéncia d'esquí d'escorreguda

en Nauta-Vesubia.

«Santa-Victòria», o coma menar una prumièra escalada

de nauta dificultat, dins la montanha que Cézanne illustrèt

tant-e-mai : lo Mont Venturi.

«Indo-Cosh 72», expedicion dins lo Pamir afgan : far lo

camin de París a Kabol e tornar, en R4 vièlhas, subrecargadas

e "poiridas". D'aquí un fum d'aventuras "mecanicas".

«Gochan» ne conta una.

Quatre racontes cortets sul tèma de

l'aventura e dels esports de montanha,

aquelis Traucs dins lo nonrés prepàusan

un autre biais d'escritura e d'inspiracion,

pauc utilisat dins las letras d'Òc

duscas ara.