Tugdual Kalvez, Glazik eus an Erge-Vihan, 'zo bet ganet e Plañvour, d'an deiz kentañ eus ar goañv 1937.

Embannet en deus dastumadennoù barzhonegoù e galleg ha divyezhek. Houmañ eo an hini gentañ e brezhoneg penn-da-benn. Un neubeudig hepken eus an testennoù-se 'zo bet embannet e-barzh Al Liamm ha Skrid dreist-holl. E zastumadenn bennañ eo, eizh barzhoneg hag hanter-kant enni, savet etre 1968 ha 1996.

A zoareoù disheñvel int : lod diwar santimantoù an endon, lod taolennus, reoù all aroueziek pe « politikel » ; diwar un awen liesdoare, dibad, pe ur menoz diazez (a zegas da soñj ez eo prederour) ; a-wechoù hir, a-wechoù berr-tre, lod gant enklotennoù, lod hep rim...

Peadra da reiñ un tañva eus blaz ar vuhez.