E Bro-Alamagn emaomp, e 1932 ; gant donedigezh Konradin en e glas e lise Stuttgart e cheñch buhez Hans penn-da-benn. Netra ne seblante liammañ an daou grennard, disheñvel bras ken e-keñver o renk sokial, ken e-keñver o mennozhioù, unan mab ur familh illur eus noblañs kozh Bro-Alamagn, egile mab ur familh eus ar vourc'hizelezh yuzev. Ha koulskoude e tiwan ur vignoniezh don etre an daou lisead. Met an naziegezh, hag an enepyuzevouriezh o ren muioc'h-mui er vro a gas an daou baotr yaouank pep hini diouzh e du. Bloavezhioù war-lerc'h en em adkavont en un doare dic'hortoz...