Segneurs, or faites pes, que Diex vous puist aidier !

S'orrez bone chacon qui moult fet a prisier

Si conme Charlemaine fist alever Garnier,

E la franche roïne qui moult le tenoit chier.

L'enfant fu preus e sage, en li n'ot qu'enseignier.

Quant li rois va en bois, ne le vot pas laissier :

Ou il porte son arc ou il tient son estrier.

E quant va en riviere, o lui maine Garnier :

Ou il porte l'ostor ou le faucon gruier.

Quant le roi veut dormir, Garniers est au couchier,

E dit chancons e sons por le roi solacier.

Jamés n'orrez tel honme por gent esbanoier.

Quant vint a ce termine qu'il pot armes baillier,

Li bons rois l'adouba, ne volt plus delaier.

De sa cort li donna le plus riche mestier :

Il le fist seneschal e son gonfanonier.

Celui n'oblia mie, ainz prist a chevauchier,

Avec lui maint baron, car il veut sormarchier

Les anemis le roi, confondre e abaissier.

Moult estoit preus e sages e larges despensier ;

Desus tous autres honmes est li bruis de Garnier.