Stu rumanzu, u quartu scrittu da Georges de Zerbi, ambientatu versa a fine di u quindecèsimu sèculu, ci rimanda à l'èpica chì a Corsica era sottumessa à u putere ghjenuvese. Stòricu, stu rumanzu l'hè di siguru, in quantu ch'ellu hè impuntellatu da parechje surgente storiche : a prima sò l'istruzzione secrete date da a Serenissima Republica di Ghjènuva, o da u Bancu di San Ghjorghju segondu à chì guvernava a Corsica, à ogni guvernatore mandatu ind'è l'Isula. Hè interessante di nutà quantu i Ghjenuvèsi piglièssinu cura di a Corsica ancu sè, in parechji casi, si pudessi pensà ch'elli a trascurèssinu , o peghju, ch'elli a trattèssinu in modu pocu mansuetu.

L'altra surgente hè un'òpera di Francesco Luri chì descrive eun precisione assai minuta l'etichetta di a corte di u guvernatore chì si trattava di seguità cun assai rispettu. Pudemu avè, in stu modu, una idea chjara di cume ella campessi a corte di u guvernatore in ogni circustanza di a so vita pùblica.

Un'altra testimunianza hè quella data da i prelati, curati o vicarii taliani incarcerati ind'è e prigiò di Bastia, vene à dì i fondi fràcichi di u palazzu di u guvernatori, da Napuleone I in 1812 per via ch'elli avìanu rifusatu di prestà u ghjuramentu di a Custituzione civile di u Cleru. Si misura, tandu, e cundizione spaventose è inumane ch'elli suppurtàvanu sta pòvera ghjente.

Gràtusine à tutti sti ducumenti stòrichi, u lettore si puderà fà un'idea abbastanza precisa di a vita, l'usi è e scelte pulìtiche à quelli tempi.