I n lu regnu di li Piccicotti, l'affari andavanu à bella megliu è più cà cusi: i rè guvirnavanu, i preti pridicavanu, l'omi facianu da omi, e donne da donne, i zitelli da zitelli, i baulli da baulli; i ghjalli alzavanu a cresta cantendu, inseme cù i cantadori, i pueta spuitavanu, l'impruvisadori impruvisavanu è i guarrieri guarriavanu.

Andava dunque tuttu à l'incanti finu à chì, un ghjornu, vense à calassi in sidione riale u rè Adumbarciu Prima, cusi chjamatu da li so ginitori chì quelli, invece d'ellu, aspittavanu, l'era stata prumessa da i maghi è da i magoni riali, una bella principessa. Adumbarciu ingrandede senza scumudà à nimu è ghjunse dunque à esse u putintone di u so regnu, tinutu da a famiglia è rivaritu da u so populu. Posatu ch'ellu fù in sidione, si ringuarcede e maniche è cumincede sulenne un discorsu chì lu mondu sanu l'avia da tene à mente.