Ieiettu hè u veru ritrattu di l'antieroe. Natu sott'à una stella scundizata, ellu ùn pudia ingrandà altrimente chè di manera for di norme. A vita paisana d'issu principiu di u XX^u seculu era più chè camonchja per quellu chì escia da famiglia povera. Ma, cum'ellu si dice, ancu e lamaghje danu fruttu. È Ieiettu averà ancu ellu, trà mezu à certe passate colme di risate, e so ore di gloria è ancu di felicità.

Cun questu racontu, fattu di veru stintu paisanescu, l'autore ci face rispirà un aria chì, per a maior parte di noi altri, hà persu u so prufumu machjaghjolu, avvezzi chè noi simu à l'indiatura d'un mondu trasfiguratu da tanti mudernisimi.