Calamaii hè una cullezzione chì vole insignà e pruduzzione significative di i chjassi duv'ella và a literatura corsa, da dui o trè decennii. Duv'ella và è chì a portanu, chì s'ellu hè ghjusta di dì chì sò sempre l'opere à fà a literatura, u valore di i libri esciuti hè di primura pè e literature chì ùn si ponu gode nè l'uffizializazione nè u ribombu ch'elle danu l'istituzione literarie.

Hè per quessa chì ogni libru sarà ancu a scuperta di un autore è ch'è no sciglieremu sempre una pruduzzione significativa di un currente, di un stile, di un pussibule futuru literariu. À quandu sarà andatu digià praticatu, à quandu chjassu novu pè a literatura nustrale, à quandu puderà ancu esse esitazione, è perché micca tira è molla trà sullecitazione è pussibili diversi.

Ma l'esigenza prima sarà a qualità di u libru chì hè l'altra primura. A robba scritta, è scritta bè, cù scrittura ammaestrata, cuscente di sè stessa è di e so manere di dì. Cerca di i piacè di scrive chì inghjennanu piacè di leghje, senza cerca elitista o intelettualisimu chjosu, ma cù dignità di una spressione ghjusta è precisa.

Sti calamaii sò puntelli di u casale literatura. Issi calamaii saranu galateiu di una cultura.