Nan heb e dad

Eur romant diwar-benn an oad-krenn eo « Nan heb e dad », pelloh eged eur romant evid ar grennarded. An oad-krenn, pe fin an oad-bugel... Penn kenta an trubuillou eta. Eun tad-koz, e-kreiz ar hantved-mañ, eo a zo o skriva diwar-benn bloavez e zaouzeg vloaz. Pell 'zo e oa se, e... 2005 ! Dispartiet e oa e dud, erru ar mare dezañ d'ober e gammedou kenta er skolaj, dezañ eur spered a gare an avañtur hag an natur... Skriva a ra evid e vab-bihan Tenenan, e-neus ar memez ano bihan hag eñ.Krennard eo hemañ pa skriv e dad-koz evitañ. Perag lakaad ar gaoz war ar bloaziou-ze end-eeun ? Peogwir e oa c'hoarvezet eun dra iskiz e 2005 : kollet e dad gand Nan. Kollet ? Ma, penaoz lavared deoh...