"Ainsi plaist au tres redoubté prince,

monseigneur de Bourgoigne, que le petit

entendement de mon engin s'applique à

ramener à memoire les vertus et fais du

tres sereins prince, le sage roy Charles,

ameur de sapience et toute vertu ; des

quelles choses, pour emplir le dit commandement,

me suis informée, tant par

croniques, comme par pluseurs gens

notables encore vivans, jadis ses serviteurs,

de sa vie, condicions, meurs, ordre

de vivre, et de ses fais particuliers : et pour

ce que moy bien informée treuve que les

biens de lui se pevent assez conduire par

ces .III. graces, ay je dit en mon prologue,

que je traitteray de noblece de courage,

chevalerie et sagece, en distinction de .III.

parties.