Penaos sevel c'hoarielloù evel ma rae gwezhall ar vugale pa vezent oc'h eveshaat saout ? Sed aze ar pezh 'vez diskouezet gant Henri Conan, deus Botoha, e-barzh un nebeud filmoù (istitlet e brezhoneg, mar plij !) a ya d'ober danvez an DVD-mañ.

Kustum eo Henri da zegemer bugale ar c'hlasoù e mirdi an Deskadurezh kenkoulz ha da genlabourat gant ar Falsab evit broudañ e skiant-prenet.

Ar mod da sevel ar c'hoarielloù paotr-saout-se a zo displeget ivez dre ar munud war un ugent fichenn bennaket, a zo bet savet gant Fañch Peru ha Malo ar Menn, o deus lakaet war baper kaozioù Henri. Ar re-se a servijo d'an oadourion a ziskouezo d'ar vugale ar mod d'ober an holl draoùigoù-se, pa vezont o tizoloiñ burzhudoù ar c'hoadoù hag ar maezioù.

Evel-se e c'hallo ar vugale a-vremañ adkavout skiant-prenet ar vugale a-wezhall ha mont pelloc'h gant anaoudegezh skiantoù an natur.