Lo melic de Silvia Chasaus

Com a l'acostumada, que'm reconeish, lhèu a la mia manièra de barrar la pòrta, e que lhèva lo cap, o meilèu que pausa L'equipe suu burèu e :

- A, Heugars ! Que'm hè gai de'vs véder !, ce'm hè, en parlant dab li cigarro en la boca. Aquera arcuelhança n'anòncia pas arren de bon. Quan lo hè gai de'm véder au comissari, qu'ei tostemps per'mor que m'a a hicar sus l'esquia un ahar dificil. De fèit, que m'aborreish tot de trac :

- Que'vs vatz ocupar de l'ahar Visenç Labaisha !

- L'ahar Labaisha ?, ce disi, estarrabonit.

- Se legètz la premsa, s'espiàvatz la telé, que saberetz de qué parli, Heugars ! Visenç Labaisha, de Gelòs !